De Emilia, Gran Lombardia e lengua lombarda/emiliana

di | 12 Gennaio 2022

(Nota: ‘sto post chi a l’è ‘n coment che hoo fad che pensi che l’è interessant tant de publegàll. Vist che l’hoo scrivud in lombard  e l’è squasi integral, stoo no li a voltàll in italian)

Question Gran Lombardia: mi pensi che gh’è de partì la Lombardia Storega de ‘na concezzion etnega lombarda. L’è vera che in antighità la pupart de l’Altitalia a l’era Lombardia, ma cont el midem penser a l’era anca Italia, prima.

In del temp i identità muden, se sistemen, cambien e se s’cepen. E donca, mi me se domandaria: incoeu cossa l’è Lombardia?

Per mi la risposta a l’è

  1.  La Lombardia ministrativa, che l’è no domà ‘na Formigonia ma ‘na terra che la gh’ha pussee de 200 agn de storia, ‘me Lombardia austriega post Napoleon
  2. El rest de la Lombardofonia “classega” (Trentin ocidental, Noara e VCO, Lombardia Svizzera)
  3. L’Emilia, e gh’hoo di dubi in sul status de Ferrara e Bologna, perchè eren lombard fina a poch prima de l’unità d’Italia e la soa identità a l’è, in di fat, assee compagna de quella che gh’è a Nord (e gh’è di cità che se senten pussee lombarde che emiliane, per esempi Piasenza)

Poeu, forsi, ‘n quajcoss in Piemont in tra Tortona e Lissandria.

In di revard de la lengua, per mi emilian e lombard inn di lengov sorelle partide, ma a l’è fallada la linia de partizzion, che incoeu la va dree soratut al confin regional e al vocalism tipegh emilian (quell che ne fa pensà al rat de la reclam del Parmareggio, per capìss). Besognaria guardà pussee ai vocai turbade e, per quell che ‘l me revarda, i dialet che incoeu ciamom emilian che però gh’hann i turbade (mantovan, olter-padan, piasentin) a inn lombard, part de ‘n grup meridional, insema a di alter dialet de transizzion (cremones e paves, per esempi)

Vist che i forze lombardiste a inn limitade, forsi a l’è mej concentràss a parlà de identità indova che ne poden capì mej che andà a dì ai padovan che gh’hann de tacà a parlà milanes e sentìss lombard, eco.

In sostanza, per mi:

  1. Lombardia: La Region ministrativa e, al massim, la Lombardofonia (poeu l’è ciar che l’è ‘na nazzion ma no per forza un Stat, de sigur el Tisin el voeur no fàss governà de nunch eheh)
  2. Gran Lombardia: la part de Lombardia che l’è foeura de la Lombardia “classega”, quella che ‘n quajvun el ciama Lombardia etnega
  3. Lombardia Storega: i vari dimension storeghe de la Lombardia, che però incoeu inn mudade assee

Lascia un commento

Il tuo indirizzo email non sarà pubblicato. I campi obbligatori sono contrassegnati *